Tuesday, December 28, 2010

ভাৰতীয় ৰাজনীতিত বাৰ্ধক্যৰ অৱসাদ

            ৰাজনীতিয়েই হয়টো এনে এটা ব্যৱস্থা য'ত বয়সৰ কোনো সীমা নাই৷ বিশেষকৈ ভাৰতীয় ৰাজনৈতিক দৃশ্যপটলৈ লক্ষ্য কৰিলে দেখা যায় যে জননেতাসকলৰ বয়স যিমানেই বেছি হয় সিমানেই ক্ষমতাৰ প্ৰতি অধিক লালায়িত হৈ উঠে৷ বাৰে বাৰে ভৰি, হাত, ককাল আৰু হৃদযন্ত্ৰৰ অস্ত্ৰোপচাৰ কৰি থাকিও তেওঁলোক যেন ভাগৰি নপৰে৷ কিন্তু পৃথিৱীৰ অন্যান্য দেশসমূহলৈ চালে দেখা যায় যে ৰাজনৈতিক ক্ষেত্ৰত দপদপাই থকা ব্যক্তিসকলৰ অধিকাংশই 50 বছৰৰ তলৰ একো একোজন সক্ষম নেতা৷ 
           ভাৰতীয় গণতন্ত্ৰত সকলো চৰকাৰী কৰ্মচাৰীৰ বাবে অৱসৰৰ সৰ্বাধিক সীমা 60 বছৰ নিৰ্ধাৰণ কৰি দিয়া হৈছে৷ এজন চৰকাৰী কৰ্মচাৰীয়ে হয়টো 60 পিছত নিজৰ কৰ্তব্য সুকলমে সমাধান কৰিব নোৱাৰিব বুলি ভাবিয়েই এনে বিধান তৈয়াৰ কৰা হৈছে৷ কিন্তু এনে নীতি ভাৰতীয় ৰাজনৈতিক নেতাসকলৰ ক্ষেত্ৰত কিয় প্ৰযোজ্য নহয় সেয়া অতি চিন্তনীয় বিষয়৷  

চিকিৎসা শাস্ত্ৰৰ মতেও বয়সৰ লগে লগে মানুহৰ স্মৃতি শক্তি ধৰি ৰখা কোষসমূহ লাহে লাহে মৰি আহে৷ 65 বছৰৰ পিছত এলজাইমাৰ(Alzheimer)-ৰ দৰে ৰোগৰো সৃষ্টি হয়৷ কিন্তু ভাৰতৰ প্ৰধানমন্ত্ৰী, ৰাষ্ট্ৰপতিৰ পৰা অসমৰ মুখ্যমন্ত্ৰীলৈকে সকলোৰে বয়স 70 বছৰৰ ওপৰত৷ এনে ক্ষেত্ৰত এইসকল বক্তিয়ে দেশৰ অতি গুৰুত্বপূৰ্ণ বিষয়সমূহৰ ক্ষেত্ৰত কি দৰে উচিত পদক্ষেপ ল'ব পাৰিব তাক ভাবিবলগীয়া৷ ড. মনমোহন সিং মন্ত্ৰীসভাৰ কেবিনেট মন্ত্ৰীসকলৰ ভিতৰত ড. সিংৰ বয়সেই   আটাইটকৈ বেছি৷ আনহাতে বয়সৰ সৰ্বাধিক গড়মান হৈছে 66.90%৷

                 সাধাৰণতে দেখা যায় যে যিসকল যুৱনেতাই ইতিমধ্যে ৰাজনৈতিক ক্ষেত্ৰখনত নিজৰ আধিপত্য দখল কৰিছে সেইসকলেও বৰ্ষীয়ান নেতাসকলক সকলো কামৰ ক্ষেত্ৰত আগবঢ়াই দিয়ে৷ আকৌ কেতিয়াবা কোনো যুবনেতাই নিজকে প্ৰাৰ্থীত্বৰ প্ৰতি মত আগবঢ়ালে পৌঢ় নেতাসকলে 'লেংমৰাৰ ৰাজনীতি' কৰিছে বুলি মত আগবঢ়াই৷ তেতিয়া তেওঁলোকে কিমান বছৰৰ পৰা দলটোৰ প্ৰতি সেৱা আগবঢ়াই আছে তাক হাইকামাণ্ডৰ ওচৰত প্ৰকাশ কৰি নিজকে যোগ্যতাৰ তুলাচনীত তোলে৷ অথচ এনে বৃহত সংখ্যক নেতাই সাংসদৰ অধিৱেশনত কি হৈছে তাক নাজানি টোপনিয়াই থাকে৷

              আচলতে বিকশিত ভাৰতবৰ্ষৰ সপোন দেখা বেচি সংখ্যক নেতাৰেই দুচকুত এতিয়া ছানি পৰিছে৷ খোলা চকুৰে সপোন দেখিবলৈ হ'লে এটা সতেজ মনৰ প্ৰয়োজন৷ কিন্তু ভাৰতীয় ৰাজনীতিত যেন এতিয়া চাৰিওফালে মাথো বাৰ্ধক্য অৱসাদে আৱৰি ধৰিছে৷

http://indianmuslims.in/indian-politicians-age/-ৰ সৌজন্যত৷

2 comments:

  1. খুব ভাল লাগিল পঢ়ি

    ReplyDelete
  2. ভাল লাগিল | বয়্সৰ সীমা ধৰি দিবৰ হ’ল !

    ReplyDelete